Basler Fasnacht 2026

-Halbierigsinitiative-

	Der Odermatt stürzt sich wie wild der Hang durab, galant. Denn scharf in d Kurve links, denn rächts und alles gar rasant. Und wenn är über d Schanze springt, denn het das au sy Reiz. Unsre Odermatt macht s Glyych, halt eifach nur vo Beiz zu Beiz.
	Z Basel dien do ab de Baim e huffe Kraiee kraiee! Denn schysse die no obenaabe, s isch zem duuredraiee! Vom Regieerigsroot baar Fetelii, hänn mir an d Baim dra bunde! Jetz kraiee d Kraiee nimm, derfir dien s dobblet so viil pfunde!!!
	"Sali Hans, wie gohts?"-"Jo bländend hösch, bi wiider voll derbi! Ich bi jo geschtert zum go Bade im Gartebeedli gsii. All Jugendlichi hänn mi griesst, ha Respäggt beko, und wie!" ...
	... "Hesch dängg wiedermol vergässe dini Unterschlüüch us z zieh"
	Dr Giuseppe Farinello, dä füllt Iisostaar in d Fläsche. Meiht dr Fuessballplatz und duet vo de Binggis d Triggot wäsche. Bim FC Reigoldswil, do weiss es jeede hösch bigott: Falls dr Liechtsteiner patzt, bekunnt denn är s näggscht Ufgebott.
	"Du Fritz, bi wiider ins Gartebad, wo d Sunne isch go schyyne. Doch dismool bin ich ooni Unterschlüüch ins Wasser yne!" "Ojee... Denn hesch sicher au d Badhoose vergässe, und bisch blutt in s Beggi dri." "Uups... Dämfall isch daas, won i im Wasser gsee ha, doch kai Chlorhuehn gsi."
	Dr Trump dä möcht das jeede huffe Gäld ligge loht. Wo in d USA kunnt oder au nur duure goht. Zum do derfür die beschti Taggtigg z wähle, duet är mälde, Sitzt är mit Expärte zämme vo dr Gmeind Birsfälde.
	Au mir hänn glatt nach Trickli gsuecht, wie me mit em Karre koschtelos und ohni Buess ka duur Birsfälde fahre. Syt me Monet düen mir ruggwärts duurefahre und hänn so Vo dr Gmeind Birsfälde 30'000 Stutz uszahlt beko.
	Der Theo macht KASSESTURZ, zieet BILANZ und sait "allem Änd... Bruuch i hyt unbedingt e HAPPY DAY und zwoor mit Happy Änd!" Är goot in e Erwachsene-CLUB, klopft an d Diir: "DOK, DOK, DOK." Und scho stoot im Diirraame d MONA MITTEDRIN im gar gurze Rogg. Am Theo si PULS raast. Är dänggt "POTZMUSIK, waas fyr e Frau!" Do sait sii "MINI KUCHI isch DINI KUCHI, ich bi hyt di TAGESSAU" Är wäält s SPORTPORNORAMA, sii styge in d ARENA, iiri MALONEY leese sy Krampf. Der Theo het s Gfyyl är kennt jetz 1 GEGE 100 wie im SUPER-10-KAMPF. Sie flischtert am Theo: "Ich will METEO.. METEO" bi iim bricht e Damm. Doch trotz STERNSTUNDE und viil WILLE droot leider e SPARPROGRAMM. D MONA seit: "Wenn dä bis 10VOR10 nid stoot, gang i zum GREDIG DIRECT, ohni Sang und Klang!" Dr Theo luegt truurig abe und gseht: D HALBIERIGSINITIATIVE isch voll im Gang. Denn syni ANTENNE isch scho lang nimm in der SCHWIZ AKTUELL und so kriegt d MONA e SUMMERLACHER, stoot uf und isch grad UF UND DERVO!
	"Sali Hans, du loos hesch mitbikoo, das wär jo schandbar glatt. Do wänn baar kaini Drämmli me, zmittst duur d Innerstadt! Denn könnt me ändlig yber d Stroos!" - "Das miesste mir denn fieere, No kennte mir ys ändlig gsee und miesste nimm delifooniere!!
	Baselbieter Waggiswääge wärde breiter, hänn s uns gseit. Well s muess jetz e Verschaalig dra, wääg dr Sicherheit. Jetz frogt sich z Lieschtel jeede Chauffeur, daas mit guetem Grund: Wien är duur das änge Döörli bsoffe duure kunnt?
	E guete Schnitzelbangg singt yber aktuelli Sache, Wo d Lyt beschäftigt und sii denn do driiber kenne lache. Drum hänn mir nocheme Parkplatz-Värs gsuecht, eme scheene Runde. Hänn gsuecht und gsuecht und gsuecht und gsuecht... doch leider kaine gfunde!
	Dr Ex-Prinz Andrew isch verhaftet worde, ohni gross Tumult. Är maint aber in Sache Epstein, triﬀt iin do kai Schuld. Är sig no nie unsittlich gsi, het är verlute loo. Doch wo d Schugger bi iim glopfe, schreyt är: D Stripper sinn ändlig do!!!
	Melodie: Henry Valentino - "Im Wagen vor mir" (Er:) Im Waage vor mir sitzt e jungi Frau. Sie schynt seer scheen z sy und au no seer nätt. Ich glaub ich glopf an iiri Autischyybe und frog sii ob sii ägscht Zyt fyr e Kaffi mit mir hätt. (Sie:) Im Waage hinter mir starrt mi e Typ aa. Ich bi mir ziimlig sicher i kenn dä nid. Jetz kunnt är uf mi zue und glopft an d Schybe, jemmer nai Är gseet aber no guet us und no fit. Zerscht hets e Kaffi gä, denn e feins Ässe. Druf aabe no e mäng romantisch Nacht. Sinn zämmezooge, hänn d Wält beraist und pletzlig het är iire Uf de Maledive e Hochzytsaatrag gmacht. Der eldischt Soon dä isch Profässer woorde. Und d Dochter hänn sii bsuecht, die woont jetz z Wien. Denn sinn sii wiider in iiri Auti gstyyge und gurz druff Zaigt d Amble am Banggeplatz ändlig grien!