Fasnacht 2008

Im Zaiche vo dr Wäärbig

	Wotsch der Inhaltsmangel kaschieere Muesch e baar Inseraat plazieere Eso wie d BAZ, daas isch gaar schlau Do hänn mir dänggt: mir mache s au!
	Im Baselbiet wott me s scho gli mol brobieere Und Drogeteschts an jedere Schuel duurestieere. Wenn s schlächte Verhalte duur daas dät zruggschritte, Denn kennt me die Teschts au uf d Schieler uswyte.
	Inseraat: D Martina nimmt dääglig, waisch das macht se fit, Gege wissi Riggständ je zwai Calgonit!”
	Mit Farbbiittel und fuulen Eier beschosse Het druurig dä Bär d Schwiz verloo und beschlosse, Dass är bstimmt nie me in es Land sich verirrt, Wo eso gege Pelzträger vorgange wird.
	Inseraat: Mechtsch Meebel lagere oder ziigle, Duets der Popov vo der Mafia biigle!” (Und d Umzugberootig isch gratis)
	Dä Aff do im Zolli, dä schnuuft und är sitzt. Är sitzt und är schnuuft und är schnuuft und är sitzt. Dä Aff wuurd, do stuunsch denn, fyr die Laischtig do Als UBS - Chef grad e Bonus bikoo.
	Inseraat: Liebe Mobiliar: Ich wollte ein Kerzli anzünden, wunderbar Plötzlig viele Bürosessel brannten, und darum hundert Arbeitsplätz verschwanden... Das habe ich wirklich nicht wella Mit freundlichen Grüssen, Ihr Daniel Vasella
	Vor Langwiili gstoorbe, sin mir doch all, Zaigt d Nati doch luschtloses Gingge mit Ball. Drum het me fir d Schwitzer-Spiel, daas isch kai Gspass All Tickets verschänggt und zwoor an d Dignitas.
	Inseraat: "Basler Daig?" "Jo nai Sie! Nämme Sie der Quick vom Leisi!”
	D Wiisseschaft zaigt yys, es isch schandbar bitter: D Goofe die wärde jetz immer wie digger. Doch s Färnsee het reagiert gaar adequaad ...
	... Und letscht Joor scho gwächslet uf s Braitbildformaat.
	Inseraat: Isch dä nei?”-“Nai, mit Perwoll gwäsche!”
	Ganz iibli Beschimpfige und Peebeleie, Baar Schleeg und baar Gingg unter lutem Geschreie. Ganz bstimmt isch daas s letschti Mol gsi wo s duet grache Und miir bi de “Pampers” dr Schiiri dien mache.
	Der Klepfer verschwindet, denn es git, ojee Bald kai brasiliaanische Rinderdarm me. Drum frogt sich daas Rind do grad ooni schlächts Gwisse: "Wo solle mir Rinder drno duureschisse?"
	S BAZ-Inseraat suecht e Frau uf der Stell Und frogt biz nervees grad als erschts d Annabelle Die schänggt em kai Blick, luegt in Spiegel und maint: Hörzu mein Naturfreund du stiehlst meine Zeit.” S BAZ-Inseraat findet das gaar nid toll Und stopft sich mit Bunte Praline gaar voll Do sait em e Ratgeber ganz in Hochglanz Cash du mir baar Facts gä, denn zieen ich d Bilanz.” E Weltwoche speeter, do sin mir doch froh Het d Brigitte vom Ratgeber Glücksposcht bikoo Graad heute in 20Minute, daasch glii Käämt s BAZ-Inseraat uf e Kicker verbii So schigg wien e Playboy vo Welt, stoot är do In der Hand e Bund Roose, hei isch d Brigitte froh Är soll doch e Focus uf ihr Buschi ha Sie gieng mit em Landfreund in s näggscht Cinema Und d Moraal vo der Gschicht: Mechtsch an d Brigitte dra Denn muesch halt e gressere Baslerstab ha!