Fasnacht 2007

iBebbiBanggTM

	Mit Nachtsichtgrät, Waffe, ain links und ain rächts. E Pfiff denn e Gingg voll an d Diire, scho dätschts. Dasch nid im Irak, nid im Libanon, Das sin zwai Verkäufer vo der Cablecom. Sogar ich als Bärgwyybuur ha e Digitalfärnseh, Well Mini Diggi isch im Tal und vo der Färni ka se gsee.
	Dr Stai statt am Goliath däm Voogel an Grind. Dr Pfiil statt im Epfel, im Gsicht vo däm Kind. Dr Zeus wirft die Blitz umenander wie bsoffe. Dr Vangogh het s link Ohr zem zähnt Mol nid troffe. Historisch betrachtet hät s kennte so gschee, Wenns in säler Zyt d Schwizer Nati hätt geh. Dr Zubi als Wächter, wär schlimm gsi, heyoo Dä hät doch e jede in d Stadt inegloh...
	Wii...äh....all....äh...are...in.....se...yeelou.....van End..se...äh...cat....is....äh..se...frend..of..e can. Daas isch do kai Schieler, wo daas duet verzelle. Dasch nummen e Dail us em Album vom Gölä. Die Liedtäggscht vom Gölä in sim nei Album dinn, Gänd der Diskussion ibers Friehänglisch wieder e Sinn.
	Do gseet me d Kasärne als Haafe, wie schigg. Das Wasser, die Beetli, daas isch doch der Hit. D Fontäne sin nid plaant, nai daas isch der Clou Do yyebe grad d Schotte fyrs Basel Tattoo. D Schotte sin blutt unterem Rogg, s isch kai Schand, Well: so laufe all Wyybuure au umenand.
	Noch hundert Mol bättle, wird d Muetter ganz bees. Nimmt s Kind uf e Schoss und druggt em nervees, E frisch Ei in Sagg, machts kaputt und sait: ”So!! Do hesch du di Ei-PodTM, jetz kasch ändlig go!!” Mir sin zwoor Wyybuure, doch nid hindedrii, Denn mir hänn do iGitarreTM und iOergeliTM.
	E Meteoryyschlaag het s Klima veränderet. D Dinos sin gstorbe und nimm umegwanderet. Jetz hänn mir doch wieder e Wandel vom Klima, Doch dr Schwiegermamme goot s immer no prima. Mis Auto lauft immer und s isch au scho roschtig, Doch s Klima dehaime isch immer no froschtig...
	Ich find do das mit däre Schuelunifoorm Nid wirklig der Hammer und au nid konfoorm. Mir sin nämlig letscht Joor in d Ferie und so, Isch zwai Wuche lang der falsch Bueb mit ys ko.
	Do d Kinder hyt gfährlig sin, empfiil ich eich do: S Primarschuelmodäll us Guantanamo!
	Dr Usfluug am Sunntig, dä isch doch zem gruuse. Dr Babbe will kai Fall us däm Kreisel uuse. D Familie die findet, es seig nimme s gliiche, Was mien die vom Färnseh au d Formel 1 striiche. S het grad ain vom Färnseh gsait, I glaub hey die spinne, Sie kenne dä Bangg do am Queerschnitt nid bringe.
	S Fruchtzwärgli Deiss Joseph macht ganz galant, E Milchreis zum Emmi ins Milchproduktland. Deert nimmt är e Bifi-Bus und faart uf d Floralp, Wo pletzlig sy s Härz shaket, ihm wirds heiss und kalt. Vorm Deiss stoot e Milchschnnitte, frogt en ganz fiis: ”Willsch du mine Traum-Sbrinz sy, min Petit Suisse?” Wie pasteurisiert ladet är se denn y, Ins Café de Paris uf zwai Gläsli Brie. Denn kauft är fyr zwai Emmetaler am Määrt Zwei Tickets fyr Zobe ans Schlagerrahmkonzärt. Scho noch nur zwai Lieder kisst sie ihn rabiato. Der Deiss usser sich kriegt e Latte Macchiato. Do kunnt ihre Babbe, e suur Appezäller Und schloot ihm ans Griesskepfli mit samt em Täller. Am Deiss isch es kääsig und är schwankt wie gsteert, Fliesst abe zu Bode wien e Camambert. ”Dä Halbrahm kriegsch nit!” Maint der Babbe gaar grell. Jetzt hoggt sie z Philadelphia mit zwai Babybel. Am Spitalbett vom Deiss stoot bim Granggebricht drunter: ”Milch macht müde Männer munter.”