Fasnacht 2005

"24" - 24 Stunde mit Frau Roth (87, Räntnerin)

	WYYBUUURE presentieere: "24" 24 Stunde mit Frau Roth (87, Räntnerin)
	06:32:08 D Frau Roth, die isch gligglig, der Daag foot guet aa. Der Schlaagraam isch glunge, d Frau Roth ziet sich aa. Sii goot jetz denn uuse und mir laufe mit. E Daag lang mit ire, s goot los liebi Lyt:
	07:48:25 D Frau Roth sott zem Doggter und stoot, s isch e Hoon, Syt Dreiviertelstund an der Drämlistatioon. E Raad rollt verbyy, d Frau Roth dänggt: "Am Schyyn no, Sott näggschtens der Räschte ko vo däm Combino." (Do stoot si, d Frau Roth und findet s gemain, Doch dänggt si mit Stolz an iir Schlaagraam dehaim.)
	08:17:02 Bim Doggter Heinz-Ueli, do waartet d Roth immer, Wel drittklass versichert, im letscht Waartezimmer. Deert dinne duet s schimmle und s het au kuum Blatz. Und uff em glai Dischli, deert ligt die nei BAZ. (D Frau Roth hofft ganz fescht, ass der Doggter bressiert, Wel in ere Stund wiird der Schlaagraam serwiert.)
	09:04:55 Bim Gränzli sait d Elsi, es syg im Fall woor, Hit lääbe d Lyt länger, so um die zwai Joor. Es syg als Entschäädigung, daas miesst me loobe, Fir die zwai Joor "Von Rohr" am Sunntig am Oobe. (D Frau Roth die sitzt do und sii schyynt gaar fruschtriert. Es het do no niemerts vom Schlaagraam brobiert.)
	14:09:31 An Qualle, Koralle und Fischli ganz glai, Muess sii gschwind verbyy und gseet glatt no drei Hai. Derbyy hätt d Frau Roth hitte numme schnäll welle, E bitzli go läädele, in d Passarelle. (D Frau Roth isch ganz nass, doch dänggt si scho dra, Wäm sii hit no äggscht vo däm Schlaagraam kennt gä.)
	16:02:39 Iir Aenggel dä segglet im Park ganz elai. Qweer iiber e Matte, um Baimli und Stai. D Frau Roth luegt em zue uff em Bänggli bim Damm Und dänggt sich: "Der Hakan kennt s glyyche Programm". (Gaar druurig duet uns do d Frau Roth graad verzelle, Sogar iiren Aenggel haig kai Schlaagraam welle.)
	20:00:48 Vier "Aspirin-Cardio"- Dablette zem Znacht Und vo dääne Glaine miens syy ganz gnau acht. Vier rooti, finf grieni und zwai Glyzeriin. Me kennt maine d Roth, wääri im "Phonak-Team". (Voorsichtig het sii der Bluetzugger gmässe Und graad noch em Mässe der ganz Schlaagraam gässe.)
	Am Ooben im Färnsee losst Zauberer Hans, Persoone verschwinde mit loggerem Danz. Wär steggt äggscht do inne, am Oobe so spoot? ...
	... Iir wäärdet s erroote, es isch do d Frau Roth.
	24:00:00 Wel hit der Erootiggmäärt vyyl besser lauft, Het si e Vibraator fyr weenig Gäld kaufft. In d Schissle mit Raam gheit d Frau Roth daas Objäggt, Denn isch am näggscht Moorge der Schlaagraam perfäggt.