Fasnacht 2001

Jä bruucht s vo däm Raasen im Staadion no mee ?
Hänn mir gescht dä Faarer gfrogt vom LKW.
„Na nai !“ - het är glache –„Do geend ir kai Wett yy.
Dasch nuur die nei Bettdeggi fir d Martinetti.“

„Daas isch jo empeerend, waas isch daas fir ain ?
Daas isch jo ganz gruusig, yych gang wider haim !“
„Berueig di doch jetzen und mach kai Spagaat.
Dasch nuur vo dr MUBA das neie Plaggaat.“

Miir machen eich Kinder noch eire Gedangge
E Bueb, e Staargge, e Blonde, e Schlangge.
Daas „Dolly“ - Prinzip wärde miir ibernää,
Doch d Gfoor isch ganz grooss s kennt e Schooffseggel gää.

Daas isch soon e „Scooter“ und „Scooters“ sin bleed / lessig

„Ouu lueg doo d Uriella und lueg wie sii schwääbt.
Soo eppis han i do no gaar nie erläbt !“
„Daas isch nid d Uriella, du bisch schon e Gloon.
Dasch nuur e neis Menschterli vo Pokemoon.“

Daas isch soon e „Scooter“ und „Scooters“ sin bleed / lessig

 „Ouu lueg mool do aane, e Zaiche vo Oobe.
Do sotte mir bätten und au bitzli loobe!“
 „Kumm wiider aabe, berueig di zem Hängger.
Dasch vomene Scooter doch numme dr Längger.“

„Worum bisch soo hässig, waas isch denn basiert ?
Du hesch doch graad letschti so ain uusbrobiert.“
„Drei Stunde lang gfaare, wie dä greeschti Dotsch...“
„...Und eerscht denn hesch  gemerggt dass en ufgglappe sottsch.“

„Naiiii......
Fir e ganz kuurze Wääg han i drei Stund lang bruucht.
Bi gfaaren und denn, daas het mi scho gschluucht.
In e Drämliglais gfaare, daas isch scho zem gruuse
Und juschtemänt ains wo noch Dornach isch uuse.“

Die Zwai hän e ganz groosse Coup kenne lande.
Do druf het är gsait:“Mir hän is blind verstande.“
Derno maine mir drei:“Es isch halt esoo.
Wie wär s anderscht meeglig d Martina z verstoo.“

„ATCGGCTTCAC.
TTAGCCTAGTC:“
„Jä waas isch daas eppe do e Proteeina ?“
„Nä nai dasch dr ganz Woortschatz vo dr Martina.“

„Hätt die Frau zwai Reedli und e Längger he joo.
Den wuurd i doch ganz sicher au uff se stoo.“

„Daas Kliiman isch z waarm, jo i find s zwoor scho besser.
Doch lueg mool die Schmätzgi, die wäärde scho greesser.“
„Daas isch doch kai Schmätzgi.“ „Joo waas isch denn daas ?“
„Dasch nuur dr Prinz Charly dängg im hooche Graas.“

Wenn Sii, liebe Bush, mool in s Ussland mien goo.
Und kai Woort wo greedet wird kenne verstoo.
Denn hogge sii doo druf, zwoor isch s zeerscht bitz kalt.
Doch miir garantieere, d Erlyychtig kunnt bald.

„Ich ha diir doch gsait, dä sott me nit bringe.
Doch du hesch jo abselut dä welle singe.“
„Ha welle schoggieere, ha dänggt s wär dr Hit.
E Bangg mit ere Pointen und bitzli Physik.“

Gaar wichtigi Lyt, Bresidänten und so.
Die wärde mool alli zem Bush miese go.
Dert schittle s em d Hand und gän Schmitzli sim Schatz.
Und är sait ganz heeflig: „Jo nämme Sii Blatz.“