2015: Eco-Pop-Song

Gosch linggs und denn rächts oder aaben und uufe.
Jä yyberall drifsch Lyt, do kasch kuum no schnuufe.
Daas isch en "Eco-Pop-Song", fyr meereri Sänger
Und bedydet so vyyl wie: "Hey s wird immer änger!!!"

Es läbt deert bi Langebrugg usse der Peter,
Imme Hysli mit 300 Quadraatmeeter.
Het ai Frau, ai Kind und e Camping-Aahänger
Und trotzdäm schreyt är ständig: "Hey s wird immer änger!!¨"

Gosch linggs und denn rächts....

Der Hansruedi Wänger, dä us Wintersinge,
Duet dääglig 10 Kotlett und 8 Wirscht verschlinge.
Är isch Eco-Pop-Fan, will d Hoose vom Wänger,
Het iim aifach s Gfyyl gä: "Hey s wird immer änger!!!"

Gosch linggs und denn rächts....

Ha zwai Stund kai Mensch gsee, trotz rassigem Laufe
und ha so im Stücki kenne ruiig yykaufe.
Doch pletzlig do schupft mi en Eco-Pop-Dränger
Und schreyt mir voll ins Gsicht: "Hey s wird immer änger!!!"

Gosch linggs und denn rächts....

En Aargauer Gmaind maint es wär an der Zyt,
Soliidarisch z sy, drum nämme die so wyt,
ai Asylant uf und daas ab em näggscht Jänner.
Jetz schreyen all Lyt deert: "Hey s wird immer änger!!"

Gosch linggs und denn rächts....

Im Baselbiet duet me, me frogt sich wieso,
D Ybrächer fangen und denn laufe lo.
Well lut eme rambasser Ybrächer-Fänger:
Iiri zwai Häftling gsait hänn: "Hey s wird immer änger!!"

Gosch linggs und denn rächts....

Der Müller der Geri, dä het ganz beschaide,
Per Selfie mol welle sy Pfiffli go zaige.
Wär s blyybe in der Hoose, wär s nid ko zem Schämmer.
Aber är hätt denn gschraue: "Hey s wird immer änger!!!"

Gosch linggs und denn rächts....

Mir dien jetz e bitzli zu eich aanesitze,
Well d Stimmig do inne die isch wirgglig spitze.
Doch s ainzige Mieesaame in däm Cliquekäller:
Das mien mir scho saage: "Hey s wird immer änger!!"