Fasnacht 2025

MIGROS-mueter!

Unsere Ufftritt an dr Bänggler Matinee vo de Bebbi Bängg im Theater Arlecchino.

	Es wärde in der Schwyz, im Fall, hänn mir ys saage lo, Lawiinehind-Yysetz, als wie mee in Aspruch gnoo. Au nach em Match im Joggeli, do luege zwai bis Zobe spoot, ob vor em Määie der Shaqiri no im Raase stoot.
	Paar Schyynbaischooner und e Ländeschutz guet montiert. E Schulter- und e Hodeschutz, richtig äng fixiert. E Schutzbrillen, e Helm, und non e Kieferschutz und so Kasch broblemlos in de Lange Erle an d Maarschyebig go.
	„Mi Frau isch ab, will sexuell bi mir nyt me passiert. Mi Doggter het bi mir e RRS diagnostiziert! „Was isch denn RRS genau, jo kasch mer s bitte saage!“ „Das isch e Riehenringsyndrom: E totali Blockaade!!“
	Und wiider macht e Laade zue, es isch scho fascht e Hoon. E Lade mit e huffe Joore Schwizer Traditioon! Schad gits dä Franz-Carl-Weber nimm. Ich kauf halt, muess scho saage, Das Spiilzyg do us China lieber imme Schwyzer Laade.
	„Pronto! Qui la Pizzeria da Antonio, guten Oobe!“ „Mir hänn e Vierjohreszyte-Pizza bstellt, doch do gits gar nyt z loobe! Statt vier nur zwai Byylaage druff! Das isch kai guete Handel!“ „Es git halt nur no Zwei-Jahreszyte, wege Klimawandel!“
	Hesch kaini Hobbyys, kai Familie und de bisch nur no dehai. Machsch kai Sport, gosch nid an Mätsch und ässe duesch immer ellai. Hesch vyyl z vyyl Zyt, nie ebbis vor, waartisch nur no uf der Tot? Denn pagg doch jetz die Chance! Und wird doch Bundesroot!
	„Ständig suff ich Bier, literwyys, es isch jo scho verreggt. Mi Psychiater het bi mir wäg däm e BSR entdeckt!“ „Was isch e BSR? Kumm sags, suscht losst mir das kai Rueh!“ „E Burgfälderstrossrefläx. - I bi die ganz Zyt zue!!!“
	„Ich ha mir e Defibrilator kauft, dä koschtet zimlig scheen. Jo, wäg däm Film vom Staat, do yyber Härzgraislaufbrobleem, Was bim e Härzinfarkt passiert, zaigt dä Film no zimlig guet!“ „He nai, dä Film zaigt nur, wie im Roothuus dinn, der Cramer tanze duet.“
	Pshhhhhhhhhhhhhhhhhhhht!! Das jetz isch nid eppe s lange Warten uf e Tram. Nai mir gseen do live, s neie SRF-Programm!
	„Sali Fritz, ich ha scho wieder e neus Handy miesse poschte.“ „ Jo, was machsch denn immer? Hösch das duet doch sicher huffe koschte?“ „Ich nimm s halt immer mit zum Shoppe“ - „Jä und denne wirds dir gstoole?“ „Nei, aber wenn i mit em Handy zaal, muess i jo wieder e Neis go hole!!“
	S git bald kai Wäärbig oni Roger Federer, es isch eso. Das liggt iim seer will är au hinter allem guet ka stoo. Jetz miesst är nur no als Daune-Federer, das wär no digg, E Wärbig mache fyr: „d Fischer Bettwarefabrik!“
	MIGROS-muetter foot, will s mit em OBI schlächt duet laufe, Alles wo mol iire gheert het yyberall go verkaufe. „Er-VOLG isch nid alles im Lääbe“, sait sii, „Und vellicht LANDI scho gly, Bim ene andere OTTO und laad en zem ene DENNER-Kebap yy.” Und so isch es ko: MIGROS-muetter isch letschti mit em MÜLLER ab. Do het mi OBI gseit COOP-ferdoori, jetz gieng alles der HORNBACH durab! MANOR - mann, han ich im OBI gseit, do muesch PRONTO duure. Verloss di CONFORAMA-Zone und hau däm e FUST in d Schnuure! Do sait mi OBI zu mir: „SPAR dir die Tips, s het ee kai Zwägg. Wäg der Schaidig isch MICASA mit samt mim Do-it Garden wäg. Jetz macht halt mi ALDI mit däm OCHSNER SPORT im Bett. Und das nur will ich e LIDL ha aber är e JUMBO het!“
	„Lütsch am Kundedienscht vo Sunrise a, hei s isch jo nid zum saage! Kunnt denn gli das sogenannti HSE zum traage!“ „Was meinsch denn du mit HSE? Was duesch du wieder schuure?“ „Das heisst soviel wie Hardstrosseffäkt! De kunsch eifach nie duure!“
	Die Dinos vom Jurassic World, das isch e grosse Gnuss. Gseen prähistorisch und au no erschreckend sehr ächt uss. Am Ganze do sinn nur die hoche Ticketpryse s Schlimme. S Glych kasch gynschtig ha, wenn d im Rialto gosch go schwimme.
	„Uf X do han ich gschrybe ka -Trump du Pflutte- und ha so vom Elon Musk persönlig e FSST bekoo.“ „FSST, was heisst denn das? Vo däm han ich nie gheert.“ „Das heisst: Freiburgerstrossstatus - Do wirdsch halt eifach gsperrt!“
	Paar linggs und rächts an d Schnuure, paar ans Aug, das kunnt nid guet. E Schlag ins Gsicht und voll uf d Nase, dass es bluete duet. Eso verschlage gsesch du nämmli, s isch halt schon e Gruus, Nach em Kampf mit eme Plastikfläschedeggel us.
	„Hommage an Nöggi“: Ig bin en Italiano, lieb Mode us Milano. Lieb Fraue die ganz Schoni, vor allem de Meloni. Oo mia bella cara Margherita, wohne dier gerade visavia. Bringe dier en chline Ständelio, oh! Ig bine keine Fluchtling, also kasch mi yne lo! Isch bin eine Franzose, mit ein Baguette in Hose. Doch denk isch an Macron, wird er schnell zum Croissant. Oo ma Cherie, ma chere Margherite. Isch hät gern eine Liason zu dritte. Du und isch und die schöne Brigitte. Wir machen es französisch: Wir streiken dann zu dritt! Ich bi eine Albaner, mir sinn BMW-Fahrer. Im Schwizer Fussballschilf, gänn mir Entwickligshilf. Oh mine schoni, schoni Margharita. Für di loss ich mini Kids in KITA. Ich halt duure, immer bis zum Schluss. Denn wie Sanija Ameti, bin ich au guet in Schuss. Yo soy un Mexicano, mit Sombrero yo te quiero. Ig bruch keine Asylo, au nid fur Fentanylo. Oh bella bella, mi bella Margarita. Ig liebi di so, wie Sonja, Claudia und Rita. I will in USA zu dir, doch stoot e grossi Muure. I saag zu Trump: „Halt d Schnuure!“ und gang halt undeduure! Ich bin ein deutscher Mann, meiner is’ wie die Deutsche Bahn: Kommt zu spät, ist nie bereit und er steht die ganze Zeit! Oh meine liebe , liebe Margehritee Nach der Ampel rechts ab durch die Mitte. Dort erwarte ich dich dann voller Stolz. Und mach beim Höhepunkt, ein Gesicht wie Olaf Scholz.

Allschwil

	„Mi Frau isch ab, will sexuell bi mir nyt me passiert. Mi Doggter het bi mir e OSS diagnostiziert! „Was isch denn OSS genau, jo kasch mer s bitte saage!“ „Dasch e Oberwilerstroossyndrom: E totali Blockaade!!“
	„Ständig suff ich Bier, literwyys, es isch jo scho verreggt. Mi Psychiater het bi mir wäg däm e OSR entdeckt!“ „Was isch e OSR? Kumm sags, suscht losst mir das kai Rueh!“ „E Oberwilerstrossrefläx. - I bi die ganz Zyt zue!!!“
	„Lütsch am Kundedienscht vo Sunrise a, hei s isch jo nid zum saage! Kunnt denn gli das sogenannti OSE zum traage!“ „Was meinsch denn du mit OSE? Was duesch du wieder schuure?“ „Das heisst e Oberwilerstrosseffäkt! De kunsch eifach nie duure!“
	Die Dinos vom Jurassic World, das isch e grosse Gnuss, Gseen prähistorisch und au no erschreckend sehr ächt uss. Die Urzytgschöopf sinn gfürchig doch am Schluss do hänn mir s gseh: S isch numme d Jubiläumsfier gsi vo der WVC.
	„Uf X han ich gschrybe ka -Trump du Pflutte- und ha so vom Elon Musk persönlig e OSST bekoo.“ „OSST, was heisst denn das? Vo däm han ich nie gheert.“ „Das heisst: Oberwilerstrossstatus - Do wirdsch halt eifach gsperrt!“
	Über Schwellheim Mir styyge in das Drämmli y. Do foht das plötzlig afo schwäbe. Vo obe gseht me Schwellheim gli. Schön, könne mir zwei das erläbe. Der Phippe Hoffmann gsesch im Dorf, Uf em Velo allne winke. Will keine zruckwinkt duets em halt Nach der zähnte Rundi stinke. Der Henry Vogt und d SVP, Dien fröhlig us däm Drämmli winke. Vo obe winkt au d FDP. Doch kei einzig vo de Linke. Der Henry fliegt uf und dervooo. Är möcht au nümme abekooo. Är fliegt dervo und ka esoo, Die 30er Zone guet umgoo. Über de Wolke, bekunnsch vo all däm Theater nüt mit. Kei Vogt, kei Morat, kei Ywohnerroot. Kei Basler Mischtkübel wo umme stoht. Kei Lindeplatz wo niemmerts neugstalte will. S isch eifach friedlig und still. Vor em losfliege hänn mir Siebe Kilo Suurchrut gässe. Mit Abfüehrmittel drinn, s isch schlimm. Doch unsri Rache die het gsässe: Wo mir nämmlig, s isch nid glooge, Überm Bachgrabe sinn gflooge. Hänn mir denn mit guetem Gwisse, Uf die Krähie abegschisse! Im Brüehl dört uf em Fuessballfäld, Gsesch wie ein sich schuurig quält. Es meiht der René in Extaase, „FC Hagen“ uf e Raase. Wien e Lüchtturm, das isch spitze. Duet vor em Jägi d Uschi sitze. S lauft wien en Uhrwärk, s het sy Reiz, Der Bächer Walti vo Beiz zu Beiz. Über de Wolke, bekunnsch vo all däm do leider nüt mit. Doch s isch schön dass es euch alli git. Dä Mischt wo abgoht dä bhaltet uns fit. Mir lande wieder und mir nämme no ein. Mir sinn z Schwellheim deheim. Mir lande wieder und mir nämme no ein.