Fasnacht 2023

Proton & Elektrone

Unsere Ufftritt an dr Bänggler Matinee vo de Bebbi Bängg im Theater Arlecchino.

	Unser Babbe isch 90 und är woont im Altershaim ellai. Bim Windlewäggsle am Moorge macht är eppe e suure Stai. Doch ab de Zwai am Noomidaag, do ka men grinse gsee. Denn sitzt er im Bus, wieder als Chauffeur vo der BVB.
	„Griezi, ich lyt a, wäg der Haizigsrevisioon, s isch wiider Zyt“ „Sii, mi Dochter het scho alles gmacht, drum bruche mir Sii nid.“ „Bi wellere Firma isch si denn, bim Stöcklin oder Siiber?“ „Nai. Si isch in der Primaar, doch ihre Lehrer isch Querystyyger!“
	Das wär jo wirgglig scheen gsi, jo das hät yys jetz no gfalle. Das wär e scheene Grund gsi, e baar Schämpisgorgge z gnalle. Jetz mien mir wiider fyr s ganz Wuchenänd, s isch zem vergässe. Dermit mir s luschtig hänn, zwanzig Pagg Kirschstängeli frässe.
	Der „Flipper“ dä schlaui Delfin, der Waal „Free Willy“ au, Der „Mobby Dick“ und au d „Arielle“ die jungi Meerjungfrau. „Aquaman“, „Waterworld“, „Verschollen auf hoher See“, Ka me z Basel gli, im Hallebadmusical gsee.
	„Du Hans ich kumm hyt nid in Usgang, weisch mii Erika, Die het hyt Pfäffer im Fudi und isch schaarf wie Paprika.“ „Jänu. Derfyr isch mini Gwendolin, wie Aromat, s isch woor“. „Jä, so heerlig wirzig, fräch?“ - „Nei, scho 70 Joor“.
	Mir finde langsam wirgglig, s wär jetz ändlig mol so wyt: Miesst die Baustell deert bim Viertelkrais ewäg, s isch langsam Zyt. Doch wird die Baustell laider blyybe, s haut is uf e Putz, Well mittlerwyyle stoot die nämmlig unter Dänggmolschutz.
	Au bi der Ziircher Bolizei, so hänn mir glatt vernoo. Syn vier Schugger nimmi us em Auti use ko. 12 Stund lang sinn die Arme stegge blyybe, doch derby, Isch s im Unterschyd zu däne z Basel, e offene Cabrio gsi.
	Mit positiver Energy, kunnt e Proton an e Party, vellig unter Stroom. Und holt e hibschi Elektrone mit weenig Widerstand us der Isolatioon. Ass an däre Stromschlager-Party, kaini Neutrone gsi sinn, isch s Bescht. Glych wievyyl Kohlekraft die Neutrone hänn, d Party isch halt nur fyr glaadeni Gescht. D Spannig zwischem Proton und der Elektrone, die wird als wie greeser. Si schlugge zwai LED-Pille, tanze wie der Tra-Volt-a und leere ihri Gleeser. Zem ihri Energie umwandle, faare si mit Turbinekraft zu ihre hai, und wärde blitzt. Doch bi Ihre, kan är sich nid entlaade, will ihre Gr-Ampère, no in der Stuube sitzt. Mäng Kilowattstunde speeter, isch si duurebrennt mit eme positive Pol. Und der Proton het jetz e Spaarlampe als Frindin. Die trinkt nur Wasserstoff und isst Kohl. Statt Auti, faart si Windrad, kocht nur mit Deggel und isch Fotovoltaik-Modäll. Und wärde si romantisch, startet sini Wärmepumpi, trotz Energiemangel no ziimlig schnäll. Doch kuum in dr Duschi foot är jeedes Mol mit ere gliehige Biire a murgse. Will si jo Strom spaart, kunnt nur kalts Wasser, do gits bi ihm halt immer grad e Kurze.
	„Du Hans wie sinn denn d Ferie gsi?“ - „E schlimmi Gschicht han ich do ka, I bruuch dringendschd e Diät, well ich e z grosse Ranze ha. Bi in de Rocky Mountains go… Paraglide und häts gnosse Doch pletzlig hänn die vo der US-Army uf mi gschosse.“
	„Der Dääge und sy FCB, erreiche no iir Ziil. Der Jans und sy Departemänt, die hänn e glaars Profiil.“ „Sorry ass i unterbrich. S duet mir Laid, iir miend s begriffe. Är gheert zu däne 370, wo legal deerfe kiffe.“
	„Mi Soon, i muess dr laider saage, i bi vo dir entdischt! Ass du au so ain bisch, eson e Kliimaaggtivischt.“ „Jä Mamme, wie hesch das jetzt gmerkt?“ - „Ganz aifach, s isch e Schand! Du Oberdotsch, du hesch no Stigg, Yyberhoolspuur an dr Hand!!“
	Hier spricht die Crew, ich bin Frau Rey, es tut uns schrecklich Leid Dieser Fluug verspätet sich um ungewisse Zeit. Der Pilot ist noch nicht hier, das haben wir noch nie erlebt. Er hat sich heute Morgen auf die Startpiste geklebt.
	„Sali ich bi der Schorsch“,- „Sehr agnääm und ich bi der Franz.“ „Ich bi der Phippe“,- „Ich der Fritz.“ - „Und ich, ich bi der Hans.“ Das Schwyzer-Nati-Fangrippli het sich in Katar droffe. Die gseen sich scho syt drissig Joor, doch normaalerwyys nur bsoffe!
	S Baustelle-Liedli (Melodie vo „Ein Loch ist im Eimer“) Die Strosse muess me sperre, liebe Toni, liebe Toni Die Strosse muess me sperre, liebe Toni und zwor ganz Worum muess me sii sperre, liebi Esther, liebi Esther Worum muess me sii sperre, liebi Esther die Stross? Will du muesch sii ufrisse, liebe Toni, liebe Toni Du muesch sii ufrisse, liebe Toni, sofort! Für das bruch ich e Bagger, liebi Esther, liebi Esther Für das bruch ich e Bagger, wie bring ich dä do hi? Mit em grosse Laschtwaage, liebe Toni, liebe Toni Mit em grosse Laschtwaage, liebe Toni und jetz hopp Das goot leider nid, liebi Esther, liebi Esther Das goot leider nid, liebi Esther, s goht nid! Worum goht das nid, liebe Toni, liebe Toni? Worum goht das nid? Liebe Toni worum? D Stroose sinn gspeert, liebi Esther liebi Esther Wäge Baustelle gspeert, überall in der Stadt
	Buureregle - Kaländer: National: Wenn der Berset luthals schimpft Het är sy Alain ganz frisch gimpft Isch der Rösti in der Natur Macht sy Albert der Rütlischwur Isch der Cassis in Brüssel ellai Wird sy Ignazio ganz ganz glai Wenn e Muurer ganz lut schreyt Isch em e Ziegelstai uf sy Ueli gheit Isch bim Naturschutz, lut Wermuth nyt loos Kläbt är mit Lyym sy Cedric uf d Stroos Will der Chiesa sich mol lo go lo Spielt är gärn mit sym Marco Polo Regional: Der Engelberger duet, ganz im Vertraue Gärn ab und zu sy Lukas haue Gseet der Sutter, dä Biozentrumglotz Suecht är mit sym Kaspar der Hotzeplotz Het der Jans nyt z due, das isch jo s Dumme Denn hängt är mit sym Beat umme Gseet der Cramer sich als Sieger Macht är sy Conradin zem Querystyyger FCB: Duets im Frei, fyr dr Maischter nimm länge Denn losst sy Alex, der Kopf lo hänge Wirds fyr der Däge langsam schyter Denn dänggt sy David fyr iin wyter Wird der Odermatt ganz blass Ligt sy Karli unterem Fass Schwellheim: Isch mol der Bammatter nid vor Ort Denn trybt sy Andreas im Färnseh Sport. Ob links oder rächts, bim Hoffmann isch s Sitte Zaigt immer sy Philippe. sträng in „Die Mitte“ Faart der Vogt mit sym Traktor uf em Fäld wien e Schelm Denn dreiht sy Franz immer, e Guurt und e Helm

Allschwil

	D Pizza isch fertig, s Cola kalt und d Chips die sinn serviert. D Hot Dogs sinn parat und s Schoggimousse, das isch aagrüehrt. S Liecht no ab, der Färnseh a, d Familie isch so wyt, Zum luege wie der Bammatter Senioreturne git.
	Der Hüehnerstall vom Bio-Hof am Herrewäg, dä isch guet Hänn mir vernoo, dass dä all Wuche, der Standort wächsle duet. Mir froogen ys und hoffe dass niemmerts gääg uns duet klaage: Jä, dörft me däne Hüehner jetzte äggscht „Zig-Hüehner“ saage?
	Vis-a-vis vom Mühlibachwäg 22 ummenand, Richtig Mühligässli 10, zwei Meter nach der Wand. Dört stoht e schöne Briefkaschte, grad näbere alten Eiche. Während drei Täg sinn mir am Dorfescht immer dört go seiche.
	Mir finde langsam wirklig, s wär jetz ändlig mol so wyt: Miesst die Baustell an der Spitzwaldstroos ewäg, s isch langsam Zyt. Doch wird die Baustell laider blyybe, s haut is uf e Putz, Well mittlerwyyle stoot die nämmlig unter Dänggmolschutz.