Fasnacht 2018

Guete Morge, liebi Sorge...

Quelle: Telebasel

	D Schwoobe jä die klauen unseri Kundschaft, aifach so. Drum klaue mir im Geegezug e Lied und das goot so: Refrain: Guete Moorge liebi Soorge Sind ir au scho wyder do? Hännd ir au so sauguet gschloofe? Jä denn sinn mir alli froo!
	Unter minere Daunedeggi, jo do schloof ich dief und fescht. Mi Kopf liggt uf em Daunekissi, daas isch aifach s Bescht. Ich drai mi um, do liggt e fremde Maa näb mir, dasch z vyil !! Und sait zu mir: "Grüezi, mi Name isch Fischer vo de Fischer Bettwarefabrikch z Wädiswil."
	Ich träum wie d Maledive untergeen im Wältemeer. Au Holland unter Wasser, daas beduuren alli seer. D Seychelle wäg, Sardinien au und d Menschhait jä die klagt. S Meer das stygt, do wach ich uf: D Bettfläsche hets verjagt !!
	Am Morge friee do heersch im Radio dä vo Wattewyyl. Guete Moorge liebi Soorge.... etc.
	Am Moorge gang i in d Beggerei, will ich deert schaffe due. E Glaibetryyb, ganz familiär, deert het me syni Rueh. Doch jetz bewärfe Menscherächtler mi mit Stai und Tepf. Drum gänd joo nie am "Black Friday", Rabatt uf d Moorekepf !!
	Mi Sohn isch 20 und sitzt hinde still im Kindersitz. Ich drai mi rasch zu ihm und saag: "Jä spinnts denn dir e bitz?" Do sait är doch zu mir, är sygi in däm Sitzli drinn, Syt är 3 isch und mir z Rieche uf Basel losgfaare sinn !!
	"Guete Daag do isch d Bolizei" - "Kenne Sii hälfe guete Maa? Mi Dampfkochtopf pfifft wie verrugt" - "Sie mien ihn vom Härd wägnää!" - "Ich ka das nid, daas Pfiffe faart emotionaal voll yy!" "Also guet, Herr Seferovic, mir schiggen ain vorbyy."
	Sie leen sich gärn verfieere, aber z wyt go, das darfsch nid. Sie nämme seer gärn Gschänggli a, au wenn s kai Danggscheen git. Und wirdsch intiimer, klaage sie. S isch immer s glyyche Lied. Däm Phänomen, däm sait me hyt ganz aifach "Baselbiet".
	In Frankrich deert gits kai Tabu, die schämme sich kai bitz. Sexuell sinn die sehr offe und sie sinn au duurend spitz. Letschti springe mi zwai Frauen a, wie d Freesch im Weiher. Nuur will ich deert äne gsait ha, ich warti uf e Dreier !!
	Die Laborratte wird fixiert, denn schittlet me sie duure, beschleunigt sie und noch baarmol, do isch sie uf der Schnuure. Ab sofort wärde jetz so Tierversiech do unternoo, Bevor me z Basel an der Herbschtmäss uf e Baan darf go.
	Uf em Tällerrand stoot e Määlwurm, um e Hals drait är e Fliege. Straalend wien e Maiekäfer duet är sich in d Sa-Biene do verliebe. Sie duftet nach Kokon Chanel und drait e Falterock vo Gina. Doch s Ganzi entpuppt sich als Kopie, well hinte stoot Made in China. Sie isch zwor Gottesabäterin und wurd dorum niemols In-Sekte go. Aber ihri Facetteauge sinn heiss wie Malaria, das macht dä Määlwurm froh. Är haig e Hysli Am-ei-See, deert kennte sie go chille. Mit Rägewirmli angle und denn Silberfischli Grille. Sie miesste mit der Wäspi faare oder der alt VW-Käfer go aschiebe. Oder sie kennten e Breme nä, will die sowieso yber der Gotthardt Fliege. Pletzlig Raupe ihri Fühler si Verstand, är macht e Grasshüpfer, woruf sie am Bode rugele. Do haut sie ihm voll an d Larve und ginggt an syni Mottekugele. Do maint dä Määlwurm, die hüttig Zyt isch für e Männli rächt verschisse. E heissi  Biene darfsch joo nid alänge, aber in e Würmli darf me bisse !!!
	Im Färnsee lauft dä "Batchelor", es luegts fascht ai Million. Im Wälschland gits vo däm jetzt au en aigeni Version. Deert haut der Constantin im Fringer Kläpper, jo s isch woor. Und haisse duet die Sändig deert "Le Bätsch a l Ohr".
	Fyr ebbis do setz ich mi y und das bis ich mol stirb. Und zwor dass do s Nachtfluugverbott meegligscht usdeent wird. Das muess men aifach duuresetze und zwor uf brächen und biege. ...
	... So wurd ich z'Obe nimmi us de Baizen uusefliege !!
	Me wott go d Autobaane lo verbraitere und dänggt denn so Kämten alli besser duure und denn wären alli froo. Doch laider irre sich die wo das wänn, mir sage s mit Beduure. Mir hänn ys au verbraiteret und kemme jetz yberall schlächter duure !!
	"Sali Fritz wie goots denn dir" - "Du Hans ich glaub ich krieg e Maise. Jetz han ich s zäänte iPhone miesse in Mischtkyybel go schmaisse. S kunnt jeedes Mol e Frauestimm und sait, sie wär us Ziiri" - "Du Duubel, das isch d Assistänz und haisse duet das "Siri" !!
	Als Niggi Näggi und als Schmutzli, geen mir all Joor wieder. In d Stadt, vertaile Kinderbiechli und singen e baar Lieder. Do kläusle mir ganz frieedlig, pletzlig steggt men yys in d Kischte. Jetz hänn doch d Schugger glatt gmaint ka, mir syyge Salafischte !!
	Am Mäntig Wysse suffe uf em Waage daas isch s wärt. Am Dsischtig 20 Bier no vor em grosse Schränzkonzärt. Am Mittwuch s glyych Programm, mit huffe Wyy isch me guet druff. Am Donnschtig uf e Mittag torggle ich hai, mi Frau isch muff. Do saag ich ihre, ass das Schimpfe yberhaupt nyt nytzt, Well miis Verhalte isch kulturell wärtvoll und vo der UNESCO gschytzt !!
	"Sali Hans, was isch denn los, worum lytisch mir denn aa?" "Mi Frau het mi afangs Joor verloo, ich bi e brochene Maa." "Jä Hans, wie isch s denn zu däm ko?" - "Jo Fritz, jetz muesch mol loose: Sie isch usgflippt won ere gsait ka ha, d Burglinde kunnt go bloose."