Fasnacht 2016

Mir sind Bundesroot!

Uffzeichnig vo Telebasel im Kohlmanns

Quelle: Telebasel

>>> E Färs im Querschnitt vom SRF (49:35) <<<

	Mir haisse "Wyybuure" und singe, dasch woor!!!! Bängg an dr Fasnacht scho bald zwanzig Joor!!!! Mir drei woone z Allschwil, jä Sii dasch kai Witz!!!! Und daas mit däm Fluuglärm, das steert yys kai bitz!!!!
	Wenn Männer ere Dame wänn go imponieere, Denn dien sii sich schniigle und guet schamponieere. Doch zaigt wie bi "VW", daas macht d Fraue muff, Noch dr Hochzyt dr Abgaaswärt au stail duruff.
	Mit Helm, Schaal und Ski steen mir do wie die Dumme Zmittst im Dezämber in de Bärgen umme. Doch finde mir wirgglig niene gopfriidstutz! E "Wurschtsalat-Spezial" unter fufzig Stutz!
	Dr Klepfer dä wittert e Pfluumekomplott Und holt us dr Muultäschen use ganz flott, Zwai glaadeni Waffle und schiesst wien e Dumme, Mit extrascharfe Mozartkuugelen umme. "Beef beef Tartar!!" deents und är trifft voll fett, Mit eme Schuss Cognac die alt Crepe Suzette. Bluetwurschyberstreemt ligt au s Spätzli scho flach Und dr Wiener stirbt gschnitzlet paniert uf em Dach. Ai riisigi Schlachtplatte ligt uf em Tisch! Jetz gseend iir wie gfäärlig son e Klepfer isch!
	Im Ditsche hän mir d Wiehnachtsdekoratioon, No vor em Advänt gholt als Super-Aggtioon. Am Zoll hänn s yys gsait, dass mir usstyge solle. Sii mieche jetz halt strängeri Kränz-Kontrolle.
	"Superflatwidescreen und das isch s geniale: 200 Zentimeter Diagonale." "Die Färnsee die wärde immer greeser, das isch e Spektakel." "Waas Färnsee! Jä nai, daas isch e neis Natel!"
	Mir sinn go dinieere im Vegan-Restaurant Und hänn yys bi dr Källnerin denn bedanggt. Sii haig jo no gaar nyt brocht an unser Tisch und gfrogt ob mir wisse wo s Tischpflänzli isch.
	"Ha e Schoggiriigel, uf e Gaartetisch do, Vergässe und denn isch s no go rägne ko. Näggscht Daag liis ich stuunend, in dr Zytig ganz unde, Me haig jetz doch glatt uf em MARS Wasser gfunde."
	"Dass me Fliigel kriege sott, find ich dernääbe, Doch noch eme Red Bull, do fang i a schwääbe. Do lueg i kurz aabe und ha denn verstande: ...
	... I bi aifach uf aim vo de neie Poller gstande."
	D Jungfrau het uf dr Blüemlisalp dr Gotthard kenneglernt Sone Männliche Bärg het ihre Gletscherspalt erwärmt. Mit sim Wildhorn isch är wien e Wildstrubel nid glooge Hinterrug an d Jungfrau ane und het ihri Gurte uszooge. Noch baar Joor het dr Gotthard e Fuulhorn bikoo Und het wäg sine Claride ständig uf e Napf miesse goo. Statt an iiri Titlis isch är nur no am Brünnelistock ghange. Do druff isch denn d Jungfrau zem San Bernardino gange. Zem iiri Liebi kenne z rette, duet dr San Bernardino sie beleere, Bruchi dr Gotthard unbedingt sofort e zwaiti Reere.
	Wäg Schneemangel hänn d Schwyzer Skifaarer do Vom Gipfel zem Taal abe z Fuess miesse go. Im Dorf unde do luegt ain ganz komisch dri. Und maint, so schnäll syge die no nie dunde gsi!
	Hät me dä Frachter in Mexiko entdeggt, Das hät die doch sicher genau so ufgreggt. Nur hätte die gmolde, deert z Mexiko unde: "Me haig 2 Tonne Kaffi im Kokain gfunde."
	Delifon: "Du... Jetz han ich zer Frau welle ligge wie immer, Do stoot sone Sicherhaitstyp im Schloofzimmer." "Jä... Die wärde halt yberall deert stationieert, Wo s nid so guet mit em Verkeer funggtioniert."
	Passe Solaarpänels ins Stadtbild yyne? Ka d Sunne trotz em Roche-Turm no gnueg lang schyyne? Ligt dr planti Flanierstroosbelaag in der Norm? Sprich: Isch är fyr d Steggelischuee no konform? Muess dr Knie wirgligg uuse mit samt syne Gleen? Jä das liebi Flichtling, daas sinn Brobleem!
	Kinderliedermedley: Dr Hans vom Baselbiet het alles, was är will. Und was är will, das het är nid Und was är het, das zaalt är nid. Dr Hans vom Baselbiet het alles, was är will. Dr Schorsch vo Baselstadt, Hätt alles wenn är will. Doch was är het, das will är nid Und wenn är will denn daarf är nid. Dr Schorsch vo Baselstadt Hätt alles wenn är will. Frére Jaques... frére Jaques... dormeee... vous?...... dormeee... vous?..... Heersch la Patrouille Suisse... Heersch la Patrouille Suisse... Vom Tattooo.... Vom Tattooo... Hinter em Minschter het e Nigerianerbiebli Kokainli fail Hinter em Minschter het e Nigerianerbiebli fail. Nigerianerbiebli Kokainli fail Kokainli finde d Schwyzer ziimlig gail. Hinter em Minschter het e Nigerianerbiebli fail. Luschtig isch s Salafischte-Lääbe Scharia Scharia..hoo...
	"Worum luege Sie so druurig drii?" "Will ich bi halt nimm derbi." "Worum wänn die denn vo Ihne Rueh?" "Die wänn nid dass ich schlumpfe due..." "Jä was mache Sii jetz gueti Frau?" "Denn bini halt der ganz Daag blau..." "Lalalalalalalala......" Der Wessels isch en Ufrisser und baggeret gärn umme. Är risst in der ganze Stadt d Strossen uf wien e Dumme. (Jetz isch gnueg!) Hai ko! Hai ko! Hai ko hai ko graad jetz! Hai ko ains an d Oore und denn ooni Znacht in s Bett. Dr Hollande, Putin, Obama und d Merkel hänn sich troffe Hänn yber d Wält bitz diskutiert und denn isch nyt me gloffe (Jetz isch gnueg!) Hai ko! Hai ko! Hai ko hai ko grad jetz! Hai ko ains an d Oore und denn ooni Znacht in s Bett. (Jetz isch gnueg!) Ooni Znacht ins Bett! Ooni Znacht ins Bett!