Fasnacht 2014

"Margarethe, sig kai dummi Ziegelei..."

Unsere Ufftritt bi Telebasel

	Nach em zäärtlige Schmutz, fasst dä Maa en Entschluss: Stryychlet die Frau und zieet am Rissverschluss. Är macht s Glaid zerscht uff, und denn wider zue… Und denn nomol uff, und denn wider zue… Und denn nomol uff, und denn wider zue… Und denn nomol uff, und denn wider zue… „Worum han ich nuur…“, maint die Frau allem Änd, „Aine verwytscht vom Baudepartemänt?!“
	„Sehr geerti Awooner vom Bluemerain Drei. Ihri Strooss isch zää Daag lang baustellefrei. Es git denn kai Baulärm, kai Bausstell, kai Schrangge. Mir mechte drum fyr Ihr Verständnis rächt dangge.“
	Delifon: „Hie isch der outomatisch Aaruefbeantworter vor schwyzer Luftwaffe… Unseri Arbetszyte si: Mäntig bis Fritig vo 8 bis Zwöufi u vom zwöi bis am fünfi. Üebigs- u Ärnschtysetz wärde jewils zum Znüni u zum Zvieri für e haub Stund unterbroche. Danke.“
	Delifon: „Do isch die Baselstädtischi Nootruefzentraale.“ „Hi…hi..hilfe…i..i..ly..yd..he..he..helle...Qu..Qu..Qua..a..le!!“ „Mir hänn s doch, Herr Morin, scho dausig Mol gsait: Baade Sie nid mit em Elektrobike!“
	Dangg em Seismograph ka me do ganz guet gsee: Der Usbruch vom Etna und s Beeben im See. Das do isch e Beebe am neerdliche Rhyy… Und do isch d Frau Merkel am langlaufe gsi.
	„Hesch du das au glääse?! Daas isch doch e Schand!“ Schreit die gueti Frau do im Dram umenand. „Die spinne doch, d Amis vo der NSA! Was i am Delifoon saag, goot doch kain ebbis aa!!!“
	Au mir hänn e Gspräch, im Gehaimen ufgnoo, vo zwai NSA-Frind und daas goot eso: „Hi Bill. Ich ha gwyysst, du lyyttisch a hytte.“ „I waiss, dass du s waisch, drum han i au hytten aglytte.“
	„Margarethe, sig kai dummi Ziegelei. Kumm zu mir, ich due uf di waarte. Well sunscht suff i mir ain ins Käppeli, mit Schnapps us em Kirschgarte. Schigg mi nid in s Heimatland vo de Synagoge, mi Verlange no dir isch z gross. Dini Jakobsbärg-e sinn wunderscheen und dini Wasserstelze aifach Hammerstross. Margarethe mach kai Theater, kumm Dänkmol driber noch, s wär doch schaad, Bi mir im Freidorf, am Bluttrainwäg mache mir e Hechtliacker in mi Brausebad. Denn leeg ich di Auf dem Rücken, schängg dir e Morgartering us Surinam fyr dini Hand. Und im Aahang gseesch no e Foti, wien i blutt uf der Heuwoog stand. Mi Stücki isch zwoor kai Langi Erle, derfyyr isch s e Breite. Und stargg wie Drey Linde, wie kai andere Zwaite. PS: Trotzdäm wär ich schandbar froo, kennt e Chirurg vom Universitätsspital, dä Im lange Loh.“ Me het dä BVB-Chef verroote und das het gfieert zer Wändi. Jetz isch är halt im Züüghus und putzt deert die ganz Schiffländi.
	Delifon: „Ja grüezi, da isch d Züüi Sittepolizey!“ „Sie ich bi do in der Sex-Box Nummere Drei. S het mi e Nutte beklaut, daas duet mi awyydere!“ „Kkä Panikkk! Mini isch grad fertig, und denn kkumi schnäll übere!“
	D Fraue die bruuche, daas macht ys scho Soorge. Zem Schmingge vier Stunde und das jeede Moorge. Und Zoobe do hänn si, das sait ys au jeede, Lut Stuudie no vierdausig Weerter zem reede. Drum wär doch fyr d WM in Katar, zu rächt, D Yyberdraagig am Moorge friee gaar nid so schlächt.
	S Beyeler- Museum, ka stolzer nid sy. So vyyl Lyt wie letscht Joor sinn no nie deert gsi. Mir wänn daas kurz wyyrdige und hänn eich do, Die beschte baar Bilder zem luege mitgno:
	Das Bild isch vom Leonardo Da Vinci und heisst: „Flucht us em Tessin“
	Das isch e Bild vom Vincent van Gogh und heisst: „Still-Leben“
	Das Bild isch vom Edvard Munch und heisst: „Portemonnaieklauete am untere Rhywäg“
	Das Bild isch vom Keith Harings und heisst: „Waageqlique in der Verkehrsfreie Innerstadt“
	In ainige Länder, hänn mir heere saage, Bruucht me am beschte Gäns, zum Diebe verjaage. Mir hänn denn baar kauft, falls e Dieb s mol brobiert. Und promt isch ain ko, und es het funktioniert. Dä isch schreiend gflychtet, diräggt in sy Van. Wo mir mit de Gäns uf ihn ygschlage hänn. „S ainzig, was uns hyt duet schluuche: Die Gäns kasch leider nimmi bruuche.“
	Schlaager-Medley Ein bisschen Spass muss sein. Dann ist die Welt voll Sonnenschein. Doch machsch e Fescht und schungglisch mit Schwung, Bruuchsch e Bewilligung! Fiesta, Fiesta Mexikana. Heut geb ich zum Abschied für alle ein Fest. Fiesta, Fiesta Mexikana. Aber bitte lyyslig, well sunscht gits gly Stress. Er hat ein knall rotes Gummiboot. Doch do gits e Verbot, daas haltisch yy! Er hat ein knall Rotes Gummiboot! Daas pagg graad wieder yy, mit däm darfsch nid in Rhy! Lustig ist das Zigeunerleben. Faria faria hooo! Brauchen dem Staat kein Geld zu geben. Faria Faria hooo! Wäg dären Ussaag do kunnsch du jetz, ins Gfängnis wägem Rassismussgsetz! Ein belegtes Brot mit Schinken. Schinken!! Ein belegtes Brot mit Ei, Ei!! Ligge die zwai näbenand im Yyschrangg, Verlangts Hygieneamt dausig Stai! Ja, ja, ja, jetz wird wieder in die Hände gespuckt. Wir steigern das Bruttosozialprodukt. Aber nid in unserm Land, s isch uns so lang wie breit. Well mir pfyyffe uf d Persoonefreizyygigkeit. Über den Wolken, muss die Freiheit wohl grenzenlos sein. Aaber nid yyber Binnige flieege. Vyyl lieber yyber Franggryych abbieege. Well der Lärm dä isch doch fataal. Und d Waggis sinn uns egaal. Marmor, Stein und Eisen bricht. Dä Schaade zaalsch, sunscht kunnsch vor Gricht! Das ist Wahnsinn, warum schickst du mich in die Hölle? Göllä, Göllä!, Göllä!!! Göllä!!! Griechischer Wein. Darfsch nid eifach so verkaufe. Komm, schenk dir ein. No ai Glaas und de muesch hai laufe! Ein Bett im Kannenfeld, da ist immer frei. Nuur bis am Zäääni, well denn kunnt d Polizei. Die Grillen singen, doch grillieeere darfsch nid, Denn das git Spuure, uf em Raase… ouu shit! Dann wär's wohl besser, wenn wir nach Hause gehn. Grad zrugg ins Schwoobeland, ou daas wär wirgglig scheen! Nuur wäre mir denn, trotzdäm schandbar froo… Wenn ihr wyyder kenntet…. als Tourischte ko…. als Tourischte ko!