Fasnacht 2013

Jä Griezi Merkel Angela

Unsere Ufftritt bi Telebasel

	Dr Armstrong dä duet sich jetz ändlig bekenne, Dass är sich doch doopt het, glatt vor jeedem Renne. Nach 17 Joor bychte jetz mir vor däm Huffe, Ass mir vor jedem Ufftritt drei Wyyfläsche suffe.
	Delifon: „Do isch s Büüro Mäss Basel, hänn Sie äggscht, José, der Graanfieerer Luigi irgendnamie gsee?“ „De Luigi abe mir uf de Baustell vo de Messe, Vor luter pressiere in de Muure vergesse!“
	Dr Mörgeli Christoph, dä het s gar nid gnosse, Wo me ihn glatt us em Museeum het gschosse. Me het ihn versuecht ka z entstaube all Moorge Und trotzdäm isch är aifach nie suuber woorde.
	"S'kunnt nütt..."
	4 Aier, Rosyynli und bitz Schwaineschmalz Denn zwai Deezi Milch, und en Ässleffel Salz. Zwai Baggpulverseggli und Schoggi nach Waal. „Also jetz spinnt die BVB-Aazaig totaal!“
	Delifon: „Hygieneamt Schmutz“ „Ich ha in de Kleepfer und au do im Ässe, e Prozäntsatz an Fäkaalbaggterie kenne mässe.“ „Das bassiert halt wenn d Lyt kaini Händsche benutze und nach em Läse vo der „BAZ“ ihri Händ nid dien putze!“
	All Daag wird der Alfons, dasch scho fascht e Hohn, Per Ambulanz brocht in die Notfallstatioon. Zermatscht und zerdruggt, und s macht ihm furchtbar weh. Är pändlet halt dääglig mit der SBB.
	Delifon: „Do Hans, wär dert?“ „Hans kumm bitte schnäll, ha ebbe mol heere saage, Du haigsch doch zwai Alkoholteschtgräät im Waage. Vo der Gendarmerie steen drum zwai näb mim Karre Und wänn vo mir wisse, ob sie no deerfe faare.“
	Der jung DRS-Färnseh won är no e Teleboy isch gsi, Het är mit der hibsche Alperose welle mitenand syy. Är het dänggt „dopplet oder nüt“ und het ihre sy Megahärz zeigt. Sie het mit eme Summerlacher gmeint, daas syg ihre so Quer wie breit. Är isch zrugg in sy Spielhuus e Time Out go nää. Het zwai Vodka Schawinski gleert und sich im Äschbacher yybergää. ...
	... Nachdäm är mit vyyl Risiko und hohem Puls im Club het trainieert, Het s SF dangg syne Best Friends, nomol als Reporter brobiert. Vor em scheenschte Sportpanorama het är ihre gsait, är wääri jedi Nachtwach Wenn är ihri Rundschau Focussiert, wurdi är schandbar schandbar schwach. „Potzmusik“ het sie gsait, sie meechti ihri Glanz&Gloria nid verlieere Und im Bett ständig miesse mit eme Minisguard hantiere. (Truurig isch är wieder in sy Spielhuus e Time Out go nää. Het wieder zwai Vodka Schawinski gleert und sich im Äschbacher yybergää.) ...
	... Im SRF goots hyt aber Benissimo, an d Alperose dänggt är nimmi me. Oh Happy Day oh Happy Day... är liebt jetz halt der Epiney.
	"Immer no nüt..."
	Delifon: „Wyybuur... Jä sali, gohts guet?... Jä...Jä... Morn am Morge gang i los am Säggsi scho gli. Denn sott y Zobe am Zääni lut Plan bi dir sy.“ „Jä... gosch di Cousin go bsueche, weisch dä in Peking?“ „Nänei nur mi Tante, weisch die am Wasgering.“
	„Roger-Federer-Halle“, das wär doch genial. „Arthur-Cohn-Multiplexkino“, phänomenal. Doch fyr unseri Uni do z Basel wär wohl „Bibliothek Hakan Yakin“ e glatts Aigegool.
	Delifon: „Polizei Basel-Stadt, jetz passe Sie uff: Ihri Frau suult sich uf em Zeebrastraiffe und stoot nimmi uff!“ „Jo, das het sie halt ammigs, syt sie gheert het, dasch s Schlimme, In de Zebrastraiffe haige do die Swarowski-Peerle dinne.“
	Delifon: „Zoohandlig Wuff-Wuff-Wuffli...“ „Do isch s Märthallemanagement, mir hätte gärn welle, Bi Ihne fyr unser Yygang e Boa lo bstelle.“ „Eson e Boa die koschtet denn scho e rächti Stange.“ „Aber denn hätte mir wenigschtens au mol e Schlange.“
	Schwizer-Medley Scho wieder hänn d Schwoobe, das isch doch e Witz, E CD erwoorbe diräggt us der Schwiz. Zwor illegal doch saage die, s miesst halt syy. Mir loose jetz einisch in die Schyybe drii: Ich han e Träne In mine n Auge Will s Bangggheimnis abgholzt wird Ich han e Träne, es isch e Lascht Sogar der Florian sägt am eigne Ascht........ E bitz Koks so wyss wie Schnee Zum vergässe was isch gscheeh Als Banker … sin mir bald sowyt Dass es kei Freiheit me git. Ewigi Boni ... wünsch ich mir Ewigi Boni ... wünsch ich dir Ewigi Boni ... was isch denn so schlimm dra? Ewigi Boni ... für uns und Vasella D Nationalbank kauft für e Butterbrot, Butterbrot, Butterbrot D Nationalbank kauft für e Butterbrot, Butter-, Butterbrot Euros yy für e Butterbrot, Butterbrot, Butterbrot. Und für d EU gits statt e Butterbrot, statt e Butterbrot nur Brot. Jä Griezi Merkel Angela Sage Sie, wie läbe Sie wie gohts denne vorah? Jä Griezi Merkel Angela Kei Kohle me für d Pole, jä was isch denn so schlimm dra Jä Griezi Merkel Angela Es kriselet z Italie und au in de USA... Jä Griezi Merkel Angela Und jetz nämme Sie vorallem no die arme Grieche dra S Griecheland jo s Griecheland S Griecheland das isch so schön.... arm! Z Griecheland jo z Griecheland..... Kriecht me us em Land Ich bi der Peerli Steibrückli Im Schwoobeland bekannt Ich sorg dass jede Deppeli Mir si s Gäld zeigt uf der Bank. Denn sorg ich dass das Bankgheimniss Das Schwizerland verloht. Und denne ziehn ich au in d Schwiyz und wird dört Bundesroot Jo lägg doch mir jo lägg doch mir, jo lägg doch mir du Schwöbli... Jo rutsch mr doch der Buggel ab und bloos du mir in d Schueh... Jo lägg doch mir jo lägg doch mir, jo lägg doch mir du Schwöbli... Jo iss du nur di Currywurscht und loss du uns in Rueh!
	Jetz kunnt är! Hopp Schwiz!!! Hopp Schwiiz!! Hopp Schwiiz!!!