Fasnacht 2011

Dä Maa do!

Unsere Ufftritt bi Telebasel

	Dä Gorilla sitzt baff, wien en Aff in sym Gheeg. Dass är nimm im Zolli isch, findet är schreeg. Är dänggt sich ganz druurig, vilicht isch daas jetz, Scho d Usswirggig vo däm nei Us-Aff-igs-Gsetz.
	Der Glai sait ganz stolz zu de Frinde: „Ich ha no s paar yysserscht spezielli und sälteni Nanos!“ Und paanisch lut hächelnd, scho zyymlig am Änd, Suecht s Omi dehei ihri Medikamänt.
	Dä Maa do, dä stoot do, es stoot dä Maa do. Är stoot do eso, will är so halt duet stoo. Und so wien är stoot, duet är Zyt umeschloo. Drum mache mir wyyter und leen ihn eso.
	„Ich gib dir e Root und zwoor ganz im Vertraue: Due die gfäärlige Sache bitte soorgsam verstaue!“ „Daas han ich doch lengschtens scho gmacht, Gott sai Dangg! Ha drum d Waffen im Näscht und mi Frau dinn im Schrangg!“
	Dä Maa do wo stoot, dä stoot immer no do Und dänggt sich eso, dass es lang kennt no go. Dä stoot do und waartet, mir finde das schytter. Drum mache mir lieber an däre Stell wyyter.
	Uf Facebook der Ufrueff zer Revolutioon, Protäscht uf de Stroose als Interventioon. Militanti Aktioone, zmittst in der Nacht. „Diggtatore verreiset! S Volgg muess an d Macht!“ Und fascht wäre dennen au d Panzer no ko. Zem Gligg het der Sutter denn d BAZ yybernoo!
	Wenn de nid ganz braav bisch in der Redaktioon, Kunnt gli scho der Sutter, als ganzi Portioon. Dä nimmt di ins Büüro und denne zum Schluss, ...
	... Paggt är di am Nagge und... BAZ!!! ... bisch du duss!
	Uf der Teer-Stroos vom West- e här, rittet stolz der Marlboro-Maa. Do gseht är in Chesterfield die hübsch Mary Long und spricht sen a. „Sie sinn doch do die Parisienne wo Avo kiffe het? Mi Name isch Philipp Morris, dä wo die grescht Wasserpfiffe het.“ Sie seit: „ich bi voll danemann aber davidoof bin ich nid!“ Und stigt gliich uf sys Rössli uf will Zi-Karre macht nümm mit. (Si Karre? - Jo, dr Muratti, kumm mach wyyter) „Mir sotte lieber hei zu dir“ seit d Mary Long mit rauchiger Stimm, „Well bi mir dehei im Äschebächer isch mi Maa der Niko-tin.“ Bi ihm dehei nach em Filter Kaffi möcht sie avo Pfiffe rauche. Är dänggt sich nur: „Wenn mi Lucky streikt, foht sie sicher avo fauche.“ Sträng seit d Mary Long: „Sig kei Camel, sunscht duets mi schluuche. Du darfsch nämmlig di Stumpe jetzt nur no mit Fumoir bruuche.“ Und die Moral von der Geschicht: Ob me Sie ka rette, interessiert uns nicht.
	Das Klima wird wermer, das ka me guet gsee. Es rägnet vyyl me und s git weniger Schnee. Au d Gletscher die blyybe schinds nym lang bestoo. Und unseri Ski-Nati... ebe jo...
	Mir Wyybuure sinn mittlerwyyle so wyt, Denn telecomtechnisch geen mir mit der Zyt. Drum schriibet eich nochhär do yy, ooni Stress. Mir schiggen eich d Pointe denn per SMS.
	Berlusconi Lied: Mochtsch Erfolg wie Berlusconi, Magg e bitzli Korruptioni. Und damit sich s Ganz au lohni, Kauf tutti Televisioni! Und wenn s dir au no graad kasch leischte, Bringt e Fussballclub am meischte. Und machsch global di no zum Affi, Hasch gli so Fründe wie Gaddaffi. Refrain: Ohhh mio bello bello Berlusconi, Liebt de Meitli me als Maccheroni. Sing vor Gricht e kline Ständeli jo. Und duesch e poco zahle, Muesch nid ins Gfängnis go.
	In Napoli muesch könne, De Müll jetz richtig trenne. De Gmüs, de Fücht und Toscht, Die ghore in Komposcht. De leere Flasche Vino, Muess in Container ino. Und de Sondermüll am End, De goht ins Parlament!
	Är biichtet vor em Papa, Wäge Meitli, Sex e Grappa. “Der Kachelmann isch schlimmer. Das sagen ig scho immer. Ich due Fraue nid verglopfe, Due nur Geld in Hoseli stopfe!“ Der Papa seit:“Herr Berlusconi, Sie derfe jetz au mit Kondomi“.
	Dä Maa stoot syt Stunden ellai do, ojee. Scho Daage lang het är kai Mensch niene gsee. Doch s isch nid so schlimm, well die Situatioon kennt er, Är schafft jo scho lenger deert im Stücki-Center.