Fasnacht 2009
Ex-Pesidänt Bush (Jyyhaaa...)
 |
Uf der ält het s e Kriise, die isch gaar nid glatt Dr Gwinn vo Ressource wird langsam gaar knapp Und trotzdäm bruucht immer no dr Hakan stuur All Daag e Fass Ärdeel, fyr syni Frisuur Delifon: „Sali Hakan, do Gigi, was hesch mir z verzelle?“ „Ich ha mi fir dr FCB-Campus aamälde welle“ „Ich ka di nit näh und s liggt nid an dim Wääse. S'isch nur fir an Campus, do sottsch kenne lääse“ |
 |
Der Köbi dä spiilt in der Stuube bitz Schach Sy Schildkrott als Gegner isch gaar nid so schwach Doch das seig em z heggtisch, duet är lamentiere Drum wuurd är so gärn, wieder d Nati trainiere |
 |
Delifon: “Jä Griezi do Strau, ich bin Achteniinzig Ich han e Kateter und schmegg e bitz briinzlig” “Daas Profil isch graad richtig, ich dankne Herr Strau Sie griege die Kaaderstell bim SFV” |
 |
Im Park isch är gsässe und het iiberlegt Do grachts und das Bänggli, daas hets zämmeglegt Nid schlimm, s isch nid s erschti Mol, wo daas bassiert Dass dr Möösiöö Oschpel, e Bangg demoliert |
 |
Bisch nuur am verlieere? Und fyylsch di ellai? Findsch hesch uf em Rugge, numme no s Zwai Denn sin mir ganz offe und saage s dir au Kauf dir doch e Villa, deert z Wollerau |
 |
Der Fluughaafe hänn d Baselbieter nid gärn Sie steere sich schandbaar ab däm lute Lärm Drum………………………………wie s ne goot Und………………………, dä Bangg nid verstoot |
 |
Delifon: “Do isch der Zivilschutz, Sie kenne jetzt reede?” “Was machet iir wenn s emol richtig duet beebe?” “Denn schalte mir schnäll und baue im Nuu E ganzi Tribiihne fir s Basel Tatoo!” |
 |
Stegg d Queen Elisabeth in es paar Strapse Denn in es ängs Body, bis sie afoot gagse Sie miesst sich nid schämme, die runzligi Frau Wel lueg nur d Madonna, die macht das doch au |
 |
D Biologe hänn gjuublet, jä nai sinn die froo E Lachs het me gfunde, är isch wieder doo Do maint der Lachs truurig, wie ka daas pasieere Dass me ain do z Basel aifach ka fischieere |
 |
Jetz maint sone Depp är haig nyt bessers z due Und wirft geg dr Mister Bush syni zwai Schue Nai dasch e Skandaal, wo uns schandbaar duet qwääle Vo dääre Dischtanz, derfsch uf kai Fall verfääle |
 |
Delifon: “Notruefzentraale, was isch Iiri Noot?” “Mi Frind het z viil gsoffe bis am Oobe spoot! Was soll I jetzt mache, är het voll ain im Stai” “Jä geen Sie zem Baschi, dä bringt en scho hai!” |
 |
Dr Vasella ka wäge der Pille nimm lache Well jetzt derf ar nid fyr dr Bhaabbscht Radio mache Dä Sänder syg dänggt und daas wüsst me scho lang Halt numme fir dr unbefläggti Empfang Uff YouTube luege... |
 |
S Buschlied:Mi Namen isch Busch und ich bi jetzt in RänteIch due bitzli Golfe und ich jaag Zytigsänte Ich mach viel Barbecue unterm scheene Sünneli Das isch jo wie won Ich President bi gsi Ref.: Är isch gsi allem Änd, e guete Presidänt |
 |
Und wil ich jetzt Zyt ha, und nid will penne Mecht iich die ganz Wält besser kenne Und bi drum denn grad, hey was dänggsch Genau! Grad iibere zur nägschte Ranch Ref.: Är isch gsi allem Änd, e guete Presidänt |
 |
Ich bi denn gange als erschts e bitz Go spaziere in de Berge vo der Schwitz Do gseen ich daas Dierli pletzlig uf em Schnneee! Hey! schrey ich, daas isch doch Calmy s Reh! Ref.: Är isch gsi allem Änd, e guete Presidänt |
 |
Denn bin ich in der Schwitz bitzli umegange Alles ooni Klaider ganz unbefange Daas isch verbote, het dä Polizischt denn gsait Und ich ha gmaint do gits Personenfreiziigigkei Ref.: Är isch gsi allem Änd, e guete Presidänt |
 |
In der Schwiz hann ich denne, bi Gutzi und Tee Mi Lieblingspartei bsuecht, die SVP Do hann ich gmerkt die bruuche doch allem Änd Dermit s e besser lauft, e schwarze Presidänt Ref.: Är isch gsi allem Änd, e guete Presidänt |
 |
Ich gang jetzt wyter doch es isch kain Gnuss Ich ha grossi Schmärze am lingge Fuess Drum e glaini Froog, denn loss ich euch in Rueh Schiggt mir ain vo euch, velicht e zwaite Schueh? Ref.: Är isch gsi allem Änd, e guete Presidänt |