Fasnacht 2003

Expo.02


	Zwai Holzryttiressli graad hinder vier Danne E Holzbriggli wo an baar Saili duet hange E Rytti, e Sandkischten und Kindergschrei Willkummen an d Heerbschtmäss Zwaidausigunddrei "Bi däm Ryttisaili het dää Duubel doo Bim Rytte doch glatt e blaus Aug abbikoo" "Bim Zruggkoo do hets mer halt, ganz im Vertraue, Doch immer der Ranzen ins Gsicht yyneghaue"
	Mool aagnoo es hätti do dää SFV S ganz Joggeli gspeert ghaa fir Maa, Kind und Frau Denn hätt doch der FCB glyych ob s hätt gsaicht Der Zueluegerduurschnitt vo GC erraicht. "Graad letschti het äär do" - "Nit loosen äär liegt" "E Fyyrzyyg mit volle Wucht an Kessel kriegt" "I han ere hibsche Frau gsait kumm doch uufe Wel du hesch e ganz scheeni Muttänzer-Kuurve"
	E Schiff und drei Type wo bsoffe dien danze Der aint hebt si Grind und het Schmäärzen im Ranze Dää drummlet und dää ziet graad e Streesli yy Daas isch gwiis die Bsatzig vo dr "Prestige" gsii. "Hesch duu nit vor zwai Joor au welle brobiere E Fääri wo duursichtig isch z konschdruiere?" "Hejoo, ha denn d Fääri an s Boord aanebunde Und laider syt denne bis hit nimmi gfunde"
	In Murten im See isch e Monolith gstande Als Kunschtwäärgg het me do dää Wiirfel verstande Miir zaigen eich jetz graad e Top-Sammlig doo Vo all dääne Voorschleeg wo an d EXPO sin koo:
	Ab em Blaan vo dr SVP lache mir drab S isch uurchig soliid und het en Eggen ab Fir dää Voorschlaag dien mir der CVP dangge E Modäll wien iir gseend ooni Eggen und Kante
	Daas Modäll vo dr Metzler daas bringt mi zem fauche Es isch naime ganz wyt ewägg graad am dauche Am Deiss syy Modäll hebt nit zämme fadaal Är maint au ganz druurig daas syyg nit normaal All Schruublecher fääle daas däät en rächt schluuche Jetz hät äär dä Boorer jo gliich kennte bruuche
	Verwaltigsreet, Määnätscher und Banggelyt Hänn fir sich elai wellen e Monolith S wär gsungge hättsch nummen uff Drei miese zelle Wel jeede syy aigenen Yygang hätt welle "Jä nai lueg jetz daas aa, loss mii nit elai Das Modäll gseet wie d Flossen uus vom Wysse Hai" "Dasch kai Monolith, duu dänggsch nummen ans Schlimme Dasch nuur do der Couchepin wo uff em Rugge duet schwimme"
	Uff Video hänn miir mool am Zwai in dr Nacht Am Phaabscht in Rom zuegluegt wien äär d Säägnig macht Är het is dermit allne zaigt dä guet Maa Wie lyycht e Museeumsnacht hitten isch z ha
	„Der Simenli Ammann isch gschdaardet perfägt ...
	... Denn het s en mit aarg vyyl Schwung in d Wyti gfägt ...
	... Isch gfloogen und gfloogen und dennen Yyskalt ...
	... Diräggt graad in Rand vo der Helge dryyggnallt“
	Im „Blick“ vor baar Wuchen isch gstande, kai Witz Der Hussein dää soll ins Exil doo in d Schwyz Me hätt in jo kennte versueche z verlaite Sich deerten im Wallis als Wolf go z verglaide