Fasnacht 2002

Wo d MIR do verglieet isch, het me grad erkennt,
Wie d MIR do mit riisige Flamme verbrennt.
Das hätt me nie dänggt ka, doch het me vernoo,
Dass d Russe deert inne dr Vodka hänn gloo.

„Jeede Mentsch isch es Stäärnli deert ooben im All.
Dr Bush isch au ains, aber s isch nid soo häll.“

„I ha iiber d Crossair kai Woort welle singe,
Aaber dä Duubel do will trotz allem ain bringe.“
„I ha do e Helge, dä isch ganz famoos,
Do gseesch e neis Shaampoo vom Christian Gross.“

„Im Joggeli het  är, daas isch jo zem schreie,
Zwai Drepfli vo däm uff e Raase lo keie.“

Dä lacht nid, dä grinst nid, do kunnsch jo nid druus
Kaasch mache waas d wottsch, dä starrt immer graduus.
Nai dasch kain us Aengland, jetz looset mool guet,
Dasch numme dr Schmid mit sym belzige Huet.

„Dä Sagg isch kabutt!“ het dä Maa letschti gfunde.
Es sig ihm scho schandbar viil Gäld dinn verschwunde.
Do sait ihm dr ander, es sig halt esoo,
Fir dä Mantel haig men e Ziircherfilz gnoo.

Ouu, jeemerlinai TV3 isch verschwunde.
Mir hän daas uf unseri Art iiberwunde.
E Quiz iiber Ziiri, daas isch nid so schwäär.
Und heisse duet s aifach: „Wäär wiird Millionäär?“

    1.) „ Sexy-Lütte“ (Knapp bekleidete Frau mit einem Glöckchen)
    2.) „De Böög värbränne (Knabe hält ein entflammtes Streichholz an die Nase)
    3.) „Sächstageränne“  (Nella Martinetti oder Jelzin muss eine Strecke von 10 Metern überwinden)

Graad letschti hän miir drei dr Samuel Schmid troffe.
Dä isch mit sim Robodog z Bärn umegloffe.
Do hänn miir doch gfunde, basst daas Sprichwoort guet,
Dass gaar männgmool s Heerli sim Hund glyyche duet.

„Die Schnitzel und Schänggel sin voller Hormoone.
Die dien doch dr Keerper au gaar nid verschoone.“
„Wenn du jetz do rächt hesch, denn nimm i doch aa,
Dass dr Helmut Kohl au vo dääne het kaa.“

„Mi Frau het Gäldmääsig ir Wuntsch fascht vergässe,
Doch het sii ufaimool paar Schnitzeli gässe
Und isch ooni Doggter und ginschtig esoo,
noch ainehalb Wuche zem Traumbuuse koo.“

„Die Schnitzel sin suuper, muesch s au mool brobieere.
Mit dääne kaasch s WC guet desinfizieere.“

„Gescht zooben am 3 isch e Grach zu mir drunge.
Mi Schnitzeli isch uusem Yyskaschte gsprunge,
Denn het s welle vorsichtig graad uuse tappe.
Zem Gligg sin ihn d Schänggeli sofoort go schnappe.“

„I ha so ains gässe, daas isch gaar nid glooge,
Do hänn sich all Musklen im Gsicht zämmezooge.
Noch däären Erfaarig han ich nid lang dänggt
Und graad son e Schnitzel am Samuel Schmid gschänggt.“

Die elteri Frau isch ellai umegloffe,
Do het sii ganz bletzlig e Fuscht in s Aug droffe.
Vo hinde het aine sii ooni schlächts Gwisse,
Am Naaseloch paggt und grad hinteeregrisse.
Denn het iiren aine in s Gnei aafoo gingge,
Daas isch ganz dumm gloffe, wel jetz muess sii hingge.
En andere het iire in d Waade bisse
Und glyychzytig het ain iir s Däschli wägggrisse.
Joo daas ka basiere und s iisch nid zem lache,
Wenn die vo dr BVB d Koontrolle mache.