Fasnacht 2000

Worum baut do d NASA denn soo dyyri Sache,
Wo sich gaar nie mälden und kai Wangg mee mache ?
Velicht isch der NASA e Fääler basiert
Und hänn statt die Sonde der Rytschkow montiert.

„D USA bringt sicher d Russe zem flueche,
Wenn sii denn bim Mars noch Lääbe dien sueche.“
„D Russe die hänn sicher kai Zyt zem flueche,
Wenn sii denn bim Jelzin noch Lääbere sueche.“

Miir zwai syyn am Ryy letschti umespaziert,
Do hänn is drei Männer brutal maltretiert.
Jetz hänn mir druus gleert und mir gseen drum wiesoo,
Sich s nit loont wenn ain us der Kiirche will goo.

„Der Phaapscht isch uff CD, daas haan ych vernoo.
Hesch duu nit so aini zer Wienacht bikoo ?“
„Die CD isch lessig, daas mues ych lut loobe.
Die schwäbt in der Luft und lyychtet am Oobe.“

S Kliima wiird weermer, daas isch nit zem lache.
Mir hätten e Voorschlaag, waas me do kennt mache.
Me miest zem d Erwärmig halt abklemme z kenne
De Ziircher verbiete dä „Böög“ go z verbrenne.

„E vyyl weermers Kliima, dasch daas won ych will.
Sunnen im Gaarten und Wiirscht uff em Grill.“
„Frai dii nit z frie, do gheisch bees uff d Schnuure.
Bivoor se uff em Grill hättsch wääre sii duure.“

„E Natel syyg gfäärlig, hesch duu mir mool gsait.
Magneetischi Wälle wo niemerts verdrait.“
„Wenn my Natel lyttet, im fall daas isch woor,
denn haut s mir doch immer e Wello ans Oor.“

„Yych haa mir e Natel kaufft fir seer vyyl Gäld.
S neischt und s bescht und s glainscht vo der Wält.
Jetz han ych s verloore, doch s lyttet all Stunde,
Wel s isch mer ins Oor gheit und haa s nimme gfunde.“

„Au myyns isch seer glai, doch s ligt nuur im Kaschte.
Yych kaa s nit soo bruuche, wel s het nuur ai Taschte.“

„Loos Brueder muesch dii doch nit esoo gweele.
Kaasch immerhin ständig s 111 Weele.“

„Daas wäär jo no scheen, doch loos jetz mool Alte,
Es faalt jo no d Taschte zem s kenne yyschalte.“

Miir laufen und wäärden ufaimool ganz spitzig.
Um d Stange danzt Frischflaisch soo zart und soo hitzig.
Do hänn mir denn s Portemonnaie grad fiire gnoo
Und fir 7.50 e Keebap bikoo.

„Dää Siech het bim Tschopp wellen ai Bänsel kauffe,
Doo mues äär tatsächlich in falsch Laade lauffe.“
„Yych haa s denn eerscht speeter gmeerggt bim produzieere,
Wo pletzlich dä Bänsel do aafoot viibrieere.“