Fasnacht 1999

Unseri Nati het gschuttet ojee
Mer hän miese lache es duet hit no wee
Dangg unserer Nati sinn miir sicher gsii
Dass me ooni Alkohol au luschtig ka syy

Do lauft denn ain komisch und schwankt umenand
Jetz drilt är im Krais und är stolpert in d Wand
Keit um und stoot uf und är schwankt non e bitz
Dä Siech dä gheert sicher zer Basler Justitz

Bim Diana-Unfall isch dr Schoffer dra schuld
Jetz brucht no dr Richter bi däne Geduld
Sie hän schiins nid gholfe und das sig sehr schlimm
Doch wie wän sie denn verklemmi hälfe wenn sie doch am fetele gsi sin

Letschti do hän mir ganz sponti und wild
Mit unserne Gedanke im Kopf umegspiilt
Mer dängge wenn Mathez am Lovey eini haut
Kennt s haisse dass är ihm nim richtig vertraut

In de Medie do isch doch sehr viil gschriibe gstande
Iber drey Elifante wo bi uns dien lande
Und au iber Clinton, Lewinsky im Bett
Hyt isch doch nur wichtig wär e Rissel het

Dr Pabbscht isch in Mexico gsy und het gsait
Dass me do die kläbrige Gummis nid drait
Aer wurdi druf luege und zwar immer schtränger
Jetz hänge die dinger dert als Fliegefänger

Zer Frau sait dr Chrischto: „Ich nimm di jetz dra!
Doch do drfir miesst ich e Gummi dra ha.“
Eigentlich wurd sie so Gummis guet finde
Wurd är doch nid immer so Schnirli drum binde

Uf em Mars do suecht d NASA nach Wasser heyoo
Drmit dert e Siidlig mit Lyt ka entstoo
Mer schriibe dr NASA: „S tuet uns viil dra ligge
Dass sie doch die Zircher dert ufe dien schigge“

Näbem Stadion däm neue gits en Altershaim
Me dänggt e bitz Lärm wär fir die Alte fain
Ideologisch au finanziell git das e Sinn
Wel nach jedem Konzärt 13 Better frey sin

„Oh Otto hohl Lottolos. Otto hohl, los!“
„Tottolos, Lottolos ?“-„Hohl Lotto bloss!“
Das isch ebbe gar nid e Witz vo uns gsy
Nai das isch dr Ditschkurs vo dr Lewinsky

D Tirke sinn hässig gsii s isch schwäär z verstoo
Mer wänn s eich erglääre und dasch eppe esoo
Wie wenn s Schwyzerfäärnsee uns wuurdi soo schände
Und statt unser „Queerschnitt“ dää „Böög“ wuurdi sände
„Wär stoot dert am Hang mit em Stogg in dr Hand
und gurglet ganz koomisch im rotgriene Gwand ?“
„Bitte kai Panigg! Bliib ruuig uf de Soole!
Dasch nur en Ufo wo d Patty tuet hoole.“

„Hey Wiggser du bleede du dumms bleeds weichs Schoof!
Du Kranke du bleedi Sau , du bisch soo doof!
Subberdepp Spinner, du Kue wo dumm frogt!“
Daas heert e Tuurischt wenn är im Taxi hoggt