Fasnacht 1998

Gwaltig find ich do die Geen fir s Gmies
Wil jetz haan ich nimme soo miedi Fiess
Ich kaa mi nämlig guet erhoole
Syt myni Dommaate d Boscht dien hoole

Wyt ewägg vom Meedierummel zem dr Stress z vergässe
Isch dr Phaapscht mit em Castro immene Schluuchbeetli gsässe
Immer wyter ewägg vom Land sait dr Phaapscht: „Hee Fidel,Halloo !
Duu deerfsch mer daas Beetli nit abtriibe loo !“

Dr Pepe und dr Pipo uus em „Zirkus Knii“
Hänn kai Zuekunft mee drum hogge sii soo druurig am Ryy
Wäge dr Geentechnoologii hänn si kai Gäld und kai Broot
Wil bi uns do herrscht yo e  Kloonverbott

D PTT macht Sache joo doo kaasch numme luege
Am Sunntig stygt äär uus und holt e Rooscht hindenuuse
Byy dääne Bryyse jeemerli nai muesch zwai mool dängge
Wenn allimool uff em Ranze ligsch

E Bangg wo nit ryymt und au nit driiber kaasch lache
Mer wisse sälber nit waas jetz mache
Soo eppis isch uns no nie basieert
Ich glaub es hänn iiber d Nacht zwai Bängg fusionieert

Dr Bischof Haas isch jetz graad ganz elai
Mit sich und syym Keerzli in Liechtestai
Fir unseri Schugger isch daas doch s beschte Byspiil gsyy
Dass daas soogenannti Mobbing au ganz glatt kaa syy

S Olympisch Fyyr het ganz häll brennt in Naagaanoo
D Lyt hänn jo Fraid an Fyyrli daas miend iir verstoo
Numme ain macht wäge de Flamme no e suure Stai
Jo daasch dr Schorsch vom vom Haafebeggi zwai

E unverstandlige Bangg

Die ganzi Wält kritisiert mer wuurde im Luxus groos wäärde
Mer wänn is jo alli verbessere doch e Boigruup kennt alles verdäärbe
Wenn bikannt wiird wie die haisse (Cood Fimf) denn kenne mer is
Dopplet schiniere....wel denn haisst s
Jetz dien die Schwyzer gar jeedem Hund syy Schyssdrägg nummeriere

Oyeemyynee jetz fallt s mer yy
Dr voorletschti Bangg isch nit verständlig gsyy
S isch nit myy dschuld es duet miir laid
Wil dää het mer geschtert d Hinggis gsait